من غير غطـا
السقف دا اللي كان غطا
رفع الغطا
فات المطر على فرشتك تحت السرير
آخر مكان تدّاري فيه سبقك إليه
ما تقولش ليه جِبْتَك أنا
لو عضِّني ناب الوجود ..
من غير هدف بالقاك عَزَا
لو بكره خدت ف ابوك عزا ..
بالقاك وجود
لو عشت انا بين الحدود
هامش على هامش وطن
بالقاك وطن وأدفّا بيك
حرب ..إنت واللي بيشبهك مسرح لها
وتفوت على غضب السَّما
وعنيك سما وغيمة حنينْ
صحّ انتَ مش حِمْل الكلام
اللي اختصرته بنظرتك
لكن ولد !
تصطاد من الشاى لقمتك
وتبلّ ريقك بابتسامة حدّ حامد ربنا
بَخْتَك أبوك ..
يعلا .. تطير
ينزل ف بير
تنزل معاه من بير لبير
لو بات ملك .. تصبح أمير
أو بات غفير
تتمنى ليله معاه تنام لو ع الحصير
متقولش ليه جبتك أنا
جابني اللي مَرَّه ناديته جِد
جابه اللي جوّه بطاقتي جِد
لا الجَدّ جَدّ ولا الهزار
يا مثبّت الراس فى الجدار
ثبّت على الجدران غطا !
من غير غطـا
