معروض للبيع
معروض للبيع :
خُذ لك كنبه
رجلين كنبه كانت رجليك
إلحقْ واشتال منّك حتّه
تعمل أراجوز
أو فرقع لوز
تغطس وتعوم
وتنام وتقوم
وتشيل راسك من تحت الشُّوم
وتجيب قُوتَك
وتسيب نَفْسَك تمن الرغيفين
حسب الإمكان
إن كان وزّان ولا مواوي
قهوجي ..عجّان ..
خشّاب .. فاعل
وقت التوضيب اعملْ حاوي
الدار كانت حضن يدفّيك
وتشدّ إيديك كلمة تقوّيك
وف برد مشير حضنها فدان
صدرها واحه
نسيان وأمان
فرح وراحه
الدار مش سقف وباب وحيطان
ورفوف شايلاك فوق الجدران
أحلام شاخت
وعينين داختْ لَفّ ودوران
الدار معناها انك مشدود
للدار داخل خارج مفقود
وتلم فُتات الدود للدود
زعلان .. يمكن مرحلة فاتت
تعبان .. الكلمة حاجات فاتت
زهقان .. دمك ما بقاش دمك
فايت ف النار ما بقاش همك
همك عقده ؟
فكها وارتاح
الليل كفنك والهم ضريح
حاسس إنك ميت بصحيح
فُوت من موتك
خرّج صوتك
يا الصبح يبان .. يا يبان صوتك
مستني يدوس عتبة دارك
جارك أو جار من أفكارك
والشتا جدران جنب جدارك
نازل وابواب
بتقول هيه وبس اللي عنيك سافرت ليها
ما بقتش عنيك حمل المشاوير
ولا هيه بتاعة أمانيها
هيه المشاوير داخت فيها
وانت المسامير ساخت في عنيك
يا عنيك الغيم
امتي تمطّر ؟
وتبلّ صَحَارى القلب عنيك !
أسس هذا الموقع ويحرره الكاتب الأديب مجدى شلبى