أبـان ماشـي
قصائد
(1)
أنا المحمي بقسوة قلب أحياناً
وأحياناً بحِسّ بليد
أعيد ترتيب ورق كوتشينه كل نهار
يفوت الصعب ..
كان عامل حساب أنهار
وما انهارشي
ألمّ اللي وقع مني
وارتِّب تاني كوتشينتي
وأقوم امشي
أشيل راسي على كتفي
واشيل نعشي
وأبان ماشي
يوزعني الأسى ..
قشَّه ف مهب الريح
تقوللي اضحك دواعي الحزن
أضحك ضحكتي السوده
وابان ماشي
نَفَس طالعه معاه الروح
نَفَس جاررني بجدوري
وانا بدوري
أجُرّ الساقيه
والساقيه أنا وتوري
أنا والميه دي دموعي
اللي عطشان اليبس ليها
وعطشانه الضلوع صحرا
(2)
أواخر كاس شهور عده
وهدا القطر ماوقفش لكن عدا
نهار بيلمه قرص الشمس ف شحوبه
مقطع توبه صيف الايام
نفد زيته ولسه منوّر القنديل
بمخزون الأمل بيعافر القنديل
صحيح الليل
طويل أكتر من اللازم
لكن أطول من اللازم
حبال البال
(3)
أسميك مانجه يا بدنجان !
واعلم فن حبك الكدبه عقل ابني
واقوله : ابني
قصور ف المشتى والمصيف
على كيفك
وعيش حسب الظروف راضي
تبات راضي .. تبات شبعان
غَنِي : كل الأراضي لك
تبرطع تدخل المولد
وَلِي حواليك مريدينك
يقوم بالخدمة خدامك
وقدامك
خليفة بهدمة المجذوب
وتقلع توب .. وتلبس توب
تشوف الصوره بالمقلوب
كده عِدله
(4)
على البتارين
ما تنصحش اللي زيي يمر
قميص من أربعه وتمانين بلون جلدي
وجلدي من كذا وستين ..
قِبِلْ يفضل بلا اكسسوار
وانا ف الدار وتد خيمه
وصاحب بسمه تدبحني
عشان يفرح بها العيِّل
ويشبع لما يلقاها
ف حر نهاره ويقيِّل
على صدري
ويضحك مهما طال الليل
ومهما كام نهار ليل
وانا قليَّل لكني كتير
(5)
ويطلع يوم ..
نهار الشمس فيه ورده !
على صدور البدور الحور
أقول إيه ده ؟!
أنا مش ده ؟!
أنا وإديا طايله الشط والمَيَّه
وطايله النور
أنا وساكن قصور
قاطع برجلي بحور
وعديتها
ومش خايف
ومش شايف طشاش شطي
وواضح للسما خطي
واخطِّي برجلي زي الريح
على صراطي
ومش متحاشه في عياطي
الأغاني عياط
ومش ماسك ف إيدي قشاط
ولا نردين
ولا قاطم في ضهري الدين
ولا الحاجه
أخاف يطلع بيان تكذيب
(6)
تخاف يطلع عليك بكره
ما تلقاش الرغيف في السوق
تلمّ القمح واجرانه
وإنسانه ؟!
تلمّ الميَّه م الوديان
تبيع الميه بالقنينه للزرعه
وقبل ما تخلص الأحزان
تلم الآهه والدمعه
تخزِّنها لزمان الجوع
تلمّ الناس ف حال ما تجوع
صوابع قايده شمع سبوع
( يا ليل طوِّل
وهات اللحن م الأوِّل
يا ريتني عشقت
عامنول )
ولا استنيت ..
ليوم العشق فيه ينباع
بقى لي دراع
يشيل الشيله مايكلِّش
وما تقضيش
بقى لي أد إيه عابد
بمحرابه رغيف العيش ؟!
أفوت من فين !
وانا ابن امبارح الجارح
ويومي أد إيه مالح !
أنا وطلعت عشوائي
بنايه واتبنت فوقي .. بأشلائي
أنا وساكن عروقي الضيق
حريق فايت
عطب ف الريق
أنا وطالع على السّقّاله
قلبي في كف ساند به
وعشق في قلبي عايش بيه
وعش بريشي عايش فيه
(7)
وطن خارج عن القضبان
وطالع تلّ
نازل بحر
نازل ف البشر تلطيش
وجيش لابس هدومه الخيش
ومستني :
جحا يرحل
حماره يموت
أو الكتكوت
يبيض بيضه
يفوت منها الجمل
شايل معاه نبوت
(8)
أمثّل مَرَّه دور ابني
يمثل هُوّه دور الأب
ياخدني ف حضن لسّه اخضر
مالوش أنياب
كتاب فيه السطور بيضا
تنِزّ الدمعه فوق خد الولد
يصحى
يقول : بابا الغطا عريان
يشوف بابا صبح عيِّل
وفوق خده الدموع وديان
أزوغ منه
وانشف دمعي في هدومه
واقول لدموعي مش يومه
واقوم ألضم ف سبحه العيد
وراه العيد
(9)
ولاد بينا
وبينا جراح
براح قايم جدار بينا
وبينا غير فروق الأرض والتوقيت
ملل واكل أثاث البيت
عذاب قلبك وانا جنبك
عذابه لو تسيبي البيت
لا انا مرتاح ولا ارتحتي
ولو دبيت
وفاض تحتي الدهب والزيت
لا قابلاني .. ولا قابلك
ولو فَضِّيت
من القلب اللي كانت
كل شئ قبلك
أفوق مرعوب على صوتك
واشوف شكلي وشكلك
ف المرايا :
ولاد
بيقلونا ف صفيحة زيت
هترجع إمتى ماما البيت
ولد عفريت !!
بيدبحني بحد الحب والرحمه
ومش قادر أقول : مليت
لكن قالها :
أشوفها بس وارجعلك
واكون لو بعتروك أهلك
ملخَّص ناسك اللي بجد فاكرينك
ولد عفريت !!
وبنت بتلوي ف دراعي
أكيد رايح تجيب ماما
وماما البيت
ولو لازم يموت الزرع على عوده
أموت شايل تراب البيت على دماغي
ويخلص عمري ف الواجب
وفي اللازم
وفي المطلوب
وابات مطلوب
في نقطة شرطة الحسابات
وافوق مرعوب على صوتك
يا ريت تاخد معاك حاجه
تجيب فيها حاجات البيت !!
(10)
نفر على مسرح الأنفار
وراه ف الدار
عيال رافعه الأيادي لفوق
ماهيش واقفه ف طابور تأديب
ولا بتدعي
عيال هيه الحطب للنار
ونار هيه اختصار عالم
¾ عموم الناس بلا محصول
وحبل قلوبهم البردانه
بالدفَّايه مش موصول !
(11)
سرقني حد كان مسروق
وانا المسروق معاه ع الخط
خطوه بخطوه جوه السوق
بنتسوَّق أسى ونعود
عرايا بجد
نجر الضحكه بَكْيَانه
تقول م اليأس ( آه يانه )
بنتسوق أسى من السوق
يبات سارق .. يبات مسروق
يبات متّاخده أيامه لشارع
(12)
بقيت عمو !!
وباقي ايامي يتلمو
ف قبضة إيد
مدقات الأسى ع الخد
هزار .. لكنه جد الجد
عامل قلبي شخشيخه
وليل ف عنيه مش طالعاله
شمس نهار
أخاف احلم ولو حبيت
أفصَّل حلم على قدي
وانا اللي مقاسي كان عالم
ورا العالم ماهوش قدي
فضحني وش داعس فيه
عجل الايام
مرايتي مش تمام
جايباني م الآخر
بيان آخر خبر ف النشره
مِدَّاري ورا العناوين
أنا والأربعين
متخلعه أبوابي
ومتركِّب مكان منها
بقيت عمو !!
(13)
قصيدة مستحيل تقراها غير فيها
بداية بيت قوافيها
أوي فيها شجن إنسان
وصوت مشدوده أوتاره
كأنه حصان
صبح مرفوع من الخدمه
ساعات أحلم أعود إنسان
غسل باله المطر م الخوف
أشِفّ .. واشوف
أشوف مالا رأت عيني
أشوف عيني عليه إنسان
عليه دايره الرحى
قشَّه ف مهب الريح
لا كان له رأي ف بدايه
ولا نهايه
وتاخده الريح
مكان ما هي عايزه
وتسافر
(14)
على إيقاع كمان الروح
مشيت مدبوح
بوِشّ حاولت أضحك به
ووشّ حاولت أهرب فيه
وتدبحني ابتسامة زيف
ومش قادر أزوغ مني
وغصبنْ عني بالقاني
كتير عريان
أنا لوحدي وسجاني
وعبء وجود فروعي
من رحم سجان
مقلعّني اللي جُوّه الجلد
مش سايب ولا طيَّه
يشوف ف عنيَّه شمعة حب
يطفيها
يقول : فيها لا هاخفيها
يجيب آخر نفس فيا
يفوت في الشعر شعر أبيض
وفي القلب اللي كان أبيض
ندوب حافر
وكام ضافر
يعيش سجاني
من قمحي اللي ف ترابي
نبت وانضمّ
وخد بالقسمه طرح وضم
وانا لوحدي
أجرجر بالألم إيدي
يجرجرني في يوم عيدي
وناب فاتورة الأيام
مناب إيدي
وكشف حساب أذون الصرف
من دمي
شيكات السحب ع المكشوف
وف الدايره ف طابور الذنب
شيل ودي
وهات عدي
أقول هتعدي ما تعديش
أشيل راسي على كتفي واشيل
نعشي
وابان ماشي
يجيب الشمس م المغرب
أقول ماشي
تغيب الشمس بالمَرَّه
أقول ماشي
(15)
أنا وقلبي بقايا ذكريات وحنين
سنين تاهت فى كام عنوان
وبال ضايع بلا عنوان
لا هو بأمري أقول ارتاح
واميّز بين جراح وجراح
واقول : الجرح دا بخاطري
يفوت قطري ما رَكّبْنِيشْ
أعينه عليّ ما يعينيشْ
يعيش بيا ..
وانا مش قادر اني أعيش
(16)
قدر محتوم
بقينا لبعض
والسّجَان دخل سجني
أنا الجاني
وانا المجني
عليه .. ازرع أسى وأجني
سما كانت سما
نزلت غمام
ما اتفك يوم دمعه
نُزُقّ العمر يوم ورا يوم
ونتّاوب
ويتناوب على الزنزانه حراسها
(17)
سرقني رغيف
بدمي عجينه متخمر
سرير فوق عضم متسمر
وبيت خَدْ طوبه من توبي
وتوب من جلدي كان مقطوع
سرقني مين ؟
ومين عامل حسابه مين ويسرقني ؟
وباسم حاجات بلا قيمه
أعلق راسي فوق الحيط
وامد الخيط
ما بين راسي ..
اللي مش واصل لها دمي
وبين دمي
اللي شربان اليبس منه
